鱿鱼游戏第二季回归，木头人公仔带男朋友上场

　　好少讲外娱。
　　尤其系泡菜国嘅娱乐话题。
　　睇翻，泡菜国音乐大概红咗10几年，即系大概成个东南亚都好红，甚至冲出亚洲个只。
　　而数落，时间啱啱好，就系千禧年香港乐坛日薄西山之后，好听啲讲，系一个好吻合嘅衔接；难听啲讲，叫替代都无妨。
　　而呢几年，泡菜国嘅电影同剧集，一样拍得非常好睇，已有冲出亚洲之势。
　　呢样嘢，又好似当年港产片一样，冲到去荷里活门口嘅感觉。
　　而泡菜国嘅剧集，呢两年最红个部，肯定非全球爆红嘅《鱿鱼游戏》莫属。
　　旧年呢套剧集上架后，以28日时间创造观看超过16。5亿小时嘅记录，荣登Netflix有史以来最受欢迎嘅影集，成为全球热门话题。
　　寻日，呢间全球最大在线视频公司Netflix（入唔到嚟冇中文名一般叫奈飞网飞），正式宣布《鱿鱼游戏》会开第二季。
　　同时发布了第二季嘅新海报。
　　海报上只有一只大眼睛，如果睇过嘅朋友，肯定认到呢个就系木头人娃娃嗰只恐怖大眼睛。
　　而《鱿鱼游戏》导演黄东赫，就特别写信给全球影迷，以新的游戏即将开始为主题透露开拍第二季嘅消息。
　　佢话《鱿鱼游戏》构思喺12年前，直到旧年先至有机会拍摄同推出，上架12日就成为Netflix20多年来最受欢迎的作品。
　　而佢作为呢部戏嘅编剧、导演同制作人，衷心感谢全球Fans支持，多谢大家观看同钟意《鱿鱼》。
　　跟住佢就正式宣布奇勋（李政宰饰）要翻嚟，Frontman（李炳宪）都要翻嚟，而西装男（孔刘）都有可能会回归。
　　重点系，你仲可以见到木头人公仔男朋友哲秀。
　　木头人公仔，喺第一季第一集就出现，呢只嘢非常残暴，讲完123木头人之后，就会180度拧转头，如果见到有人郁，就会即刻开枪扫射。
　　但亦因为佢可爱得嚟，又好得人惊，所以成为《鱿鱼游戏》一个知名icon。
　　其实呢个木头人公仔有个韩名，叫英熙，佢嘅形象来自韩国70、80年代嘅教科书。
　　英熙有个好朋友叫哲秀，呢两位小朋友不时会喺韩国嘅教科书插图中出现，系韩国人嘅童年回忆。
　　有啲似我哋旧时人教版嘅初中英语教科书中嘅韩梅梅同李雷。
　　有睇过《鱿鱼游戏》第一季嘅朋友，都会知道鱿鱼游戏以及剧中出现过嘅木头人游戏、拔河游戏、椪糖游戏、弹珠游戏等等，都系以前韩国小朋友玩过嘅游戏。
　　而第二季有埋哲秀同英熙呢对最佳拍档拍住上，惊栗同恐怖程度，肯定会再升级。
　　至于第一季出现嘅其他角色，其实个个演技都好好，令观众印象深刻。
　　虽然呢啲角色大多数，都喺剧中玩游戏输咗而冇咗条命。
　　不过主角奇勋（李政宰）早排接受访问，就漏口风话，双门洞的骄傲奸角朴海秀会被救翻。
　　而脱bei女郑好娟就会以孖生姊妹嘅身份翻生。
　　咁讲又似层层喎，因为双门洞的骄傲第一季结尾同奇勋困兽斗输咗，被面具人射杀，但镜头就冇交代佢系咪真系瓜咗。
　　至于脱bei女就因为身体被玻璃片刺中瓜咗，旧角色肯定冇办法复活，借用双胞胎姊妹嘅玩法，又的确系好多电影电视剧续集欺骗观众满足观众嘅惯常手法。
　　《鱿鱼游戏》第一季一共有9集，故事讲述456个背景唔同、各自争人周身债、人生失意嘅人，为咗赢得456亿韩元嘅奖金，而参与致命嘅儿童游戏。
　　剧集爆红唔止令全球掀起鱿鱼热，周边产品多不胜数，最犀利嘅系呢部剧可以得到全球各地观众嘅认同。
　　饰演001号刚布爷爷嘅吴永秀，仲夺得同奥斯卡齐名嘅金球奖最佳电视男配角。
　　饰演主角奇勋嘅李政宰，亦荣获评论家选择电视奖男主角奖、美国演员工会奖等等大奖，为韩国影视圈带来耀眼光环。
　　睇到人哋泡菜国流行文化可以席卷全球，睇翻我哋
　　不断以怀旧之名，不停循环消费情怀，搞出一个又一个怀旧粤语歌、怀旧港产片嘅元宇宙。
　　而呢种元宇宙，虽然入边冇疫情、好辉煌、又型又劲，但系就充满过去式嘅自我感觉良好。
　　所以，唔好再提乜嘢粤语流行文化有机会翻生嗰啲衰嘢啦。
　　如果有人觉得有，咁可能系睇多咗综艺。